E ARTE DI PADU LAMPE- STANLEY KUIPERI

'E arte di Padu Lampe' ta un obra compila y skirbi pa artista visual y docente di arte Stanly Kuiperi.

Fundacion Pa Promove Cultura (na Honor di Padú Lampe) su obhetivo ta salvaguardia, digitalisa, proteha y comparti e composicion, cancion, pintura, potret y bukinan di sr. Juan Chabaya Lampe, miho conoci como Padu. E fundacion a lanta na aña 2000 tempo cu Padu a cumpli 80 aña di edad. Nomber di e fundacion ta Fundacion pa promove cultura na honor di Padu Lampe, popularmente yama Fundacion Padu Lampe.

A comisiona e buki aki como parti di e conmemoracion di e centenario di Padú Lampe dia 26 di April 2020. Dedica na su carera como artista pintor autodidactico durante trayecto di 8 decada di su bida, e buki ta ilustra e coleccion mas grandi di Padú su obranan cu un splicacion di su diferente estilo, etapa y tecnica; na Papiamento y tambe Ingles, pa asina dun’e un mayor capacidad di difusion.

E diseño grafico ta di diseñador grafico Steffen Maas, kende a haci un trabou profesional di punta pa punta den capta e esencia di Padú atrabes di un buki cu ta completamente na color. Steffen Maas ta conoci pa su material di les pa mucha ‘Mi buki di Aruba'.

UNOCA y Prins Bernhard Cultuurfonds a haci e produccion di e buki posibel pa medio di sosten financiero.

Na e momentonan aki e fundacion tin tres proyecto. E prome proyecto ta e digitalisacion di tur documento y potretnan di Padu. E di dos proyecto ta digitalisa composicionnan di Padu, pasobra el a haci di dje na un manera hopi diferente. Padu tabata toca riba piano y tabata graba esey apart riba un cassette, despues e tabata coy otro cassette y canta. E di tres proyecto ta e buki di arte di Padu.

Stan Kuiperi autor di buki di ‘E Arte di Padu Lampe’, a splica cu su tarea tabata pa cuminsa registra, conserva y promove tur trabou cu Padu Lampe a haci. E buki ta un resultado di e esfuerso haci. E buki ta duna informacion di e cuadra- y pinturanan cu Padu a produci desde su 16 aña te su 95 aña. E buki ta completamente na color y ta costa 50 florin. E ta na benta na Patio 15, na Boekhandel Van Dorp y cerca miembronan di directiva y cerca autor Stan Kuiperi.

E proximo proyecto ta di comberti e cas di Padu den Beatrixstraat den un Museo interactivo cu lo hiba su nomber ‘Museo Padu Lampe’.

Fuente: Biblioteca Nacional Aruba 8/12/2020