GUIA DI INVESTIGACION HISTORICO DI BOY ECURY

Na fin di aña 2018, Fundacion Amigonan di Archivo a clausura e proyecto titula “Archivo di Boy Ecury”. E meta di e proyecto aki tabata pa inventarisa, digitalisa, restaura y haci e archivo digital disponibel pa investigacion. E coleccion valioso aki a wordo traspasa pa Archivo Nacional Aruba dor di famia Ecury algun aña pasa. E resultado final di e proyecto tabata un inventario completo di tur e material cu tin disponibel pa asina interesadonan por haci nan investigacion. E material digital ta disponibel via di e website di Archivo Nacional Aruba, esta: www.ana.aw y of tambe riba e website di www.niod.nl (Netwerk Oorlogsbronnen di Hulanda). NIOD ta un centro di conocimento y informacion tocante guera, Holocaust y Genocide na Hulanda.

Banda di e inventario e proyecto a produci un buki (onderzoeksgids) cu yama “Guia di Investigacion historico di Boy Ecury”. E buki aki a wordo scirbi pa lider di e proyecto Srt. Daniella Britt. Cu e buki aki nos kier a trece e historia di Boy Ecury mas serca di nos comunidad y particularmente nos muchanan di scol. E texto ta na Papiamento y Hulandes. E guia di investigacion a wordo financia pa UNOCA Aruba, mientras e proyecto den su totalidad a wordo co-financia pa vFonds di Hulanda y Prins Bernhard Cultuurfonds Caribbean.

 Source: Telenoticia Telearuba