EMBARASO Y PARTO DEN HARMONIA

379829 Regular price Afl 35.00 Save Afl -35.00
4 in stock

PROLOGO PAKICO E BUKIAKI TOCANTE EMBARASO?

Embaraso ta un evento hopi intenso den bida di hende muhe. Fisicamente, hende muhe ta cambia masha hopi mes dor di e yiu cu ta crece den su barica. Ademas e ta cambia emoshonalmente tambe, pa un gran parti bou di influencia di cambio hormonal. En realidad, embaraso y parto ta evento completamente natural cu no tin nod'i siña. Sinembargo, como cu nos ta biba den un mundo asina leu di naturalesa y hayamento di yiu ta bira menos frecuente y na mesun momento e ta algo hopi special, nos ke sa mas di dje. Nos ke informa nos mes; nos ke sa tur cos cu tin di ber cu embaraso y parto. Ta parce, cu e ora ei ta sinti menos miedo (pa loke ta desconoci), specialmente durante parto. Esaki na su turno ta haci posibel pa reacshona na e momentonan necesario na un manera adecua y cu confiansa. Ta posibel pa compara un bon preparashon pa embaraso y parto cu e preparashon di atleta pa core un distancia largo.

Tur hende por core cierto distancia, pero esun cu a prepara bon p'e, por lo general ta gana y tin menos riesgo pa keda lesiona. Na mesun manera, parto por dura algun ora y por exigi hopi di e resistencia y perseverancia di e hende muhe. Preparashon p'esaki por ta hopi extenso, pero lo tin un efecto positivo riba calidad di e proceso di embaraso, e parto y e recupe-rashon despues di parto. Pues, intenshon di e buki aki ta, pa laga hende muhe compronde miho e procesonan cu ta tuma luga den su curpa durante embaraso y parto. Pero no solamente lo suministra informashon en cuanto desaroyo di e yiu den su barica y e manera cu su curpa ta adapta na e proceso, sino lo pone enfasis riba posibel manera pa contribui na un desaroyo sano di tanto e mama como e yiu.

Asina ta bira posibel, cu e hende muhe mes ta participa activamente na e proceso completo.Y manera a menshona caba, un participashon activo na e proceso completo di embaraso y parto, por contribui na un recuperashon mas rapido y completo. Mi ta spera cu e buki aki na un manera comprendibel. por contribui na esei.

Punto di salida di e buki aki ta cu embaraso no ta algo cu ta djis 'pasa' den bida di e hende muhe. No ta necesario pa acepta e consecuencianan di embaraso sin mas. Di un banda no tin sentido pa combati e consecuencianan natural di embaraso, por ehempel, dor di tuma dieta pa keda delega. Di otro banda ta hopi bon posibel pa compensa cierto efecto negativo pa medio di un adaptashon -hopi biaha temporal- di e stilo di bida. Asina ta cuminsa un proceso harmonioso di actua concientemente y asta anticipa e exigencianan nobo di e curpa. Esei ta conta tanto pa e embaraso completo como pa e parto, na cual por copera pa medio di control propio.