POEMANAN DI RUTHY

409802 Regular price Afl 19.90 Save Afl -19.90
5 in stock

Ruthy “Lady Ruth” Vrieswijk-Bergen a nace na Aruba dia 23 di Juni 1957 den hospital di Lago riba un bunita diadomingo. El a lanta y crece orguyosamente den e bario di Dakota, Dakota tur dia. Ruthy a bay Mon Plaisir Basis School y Mon Plaisir College Mavo 4 y el a cursa Avond Havo pa dos aña.

Ruthy a cuminsa traha cu 16 aña y su prome trabao tabata na Radio Kelkboom, situa e tempo aya den Emmastraat na Playa.

E tabata klerk den Departamento di Transferencia di Aruba Bank, telefonista na Holiday Inn, Coordinador di actividad y anfitrion social na Aruba Beach Club y Casa del Mar Hotel.

Despues Ruthy a bolbe den radiodifusion como traductor y presentado di noticia na Radio Galactica. Despues di un periodo cortico ey, el a bay back Radio Kelkboom, unda te na 2009, el a presenta su programa semanal “Dushi Awasero Musical”, den cua e tabata declama poema den cuater idioma, tene entrevista, conta storia cortico combina cu musica di su gusto, scogencia y preferencia.

Un maestro di Avond Havo, Sr. Anton Claassen, a inspira Ruthy pa pone su pensamento y sentimentonan riba papel y cu 16 aña caba el a cuminsa skirbi versonan simpel cu ta rima, loke te dia di awe ta su estilo faborito.

Cu tempo el a expresa su mes den otro tipo di expresion tambe, pero cu no ta rima. Poemanan hopi largo tin biaha, cu hopi ripiticion pa accentua su pensamento. E gusta e cos aki masha. Poeticamente bisa, palabranan na baratiyo cu di un forma of otro mester por cende un lus den curason di otronan.

Ruthy ta spera sinceramente cu maske ta un di e palabranan expresa aki por keda planta como un simiya di amor y di gran inspiracion.

Ruthy ta un Arubiano cu ta stima y cu ta kere den nos grandinan, nos dushi hendenan cu pa un of otro motibo no a caba nan school of cu no a bay school avansa manera Universidad.

Ruthy ta esposa, mama di dos yiu homber y wela hoben di tres nieto y un nieta. E ta felismente casa cu e amor grandi di su bida Johan Vrieswijk. Na December 2012 nan ta haci 35 aña casa.

Ruthy tabata un lider scout active (32aña), active den Women’s Club of Aruba (25 aña) y tambe miembro active di Order of the Eastern Star Aruba (23 aña). El a retira di tur esakinan pa e tin mas tempo pa su mes y su famia.

El a produci 6 disco compacto di su propio poemanan na Papiamento, Hulandes y Ingles. Temanan di amor cu nunca ta perde nan balor. Entre esakinan pa ocasionnan manera dia di Mama y dia di San Valentino. Tambe e tin varios inspiracion tocante su dushi isla Aruba.

Como poeta local y den farandula, semper Ruthy a hiba un bida transparente. Boso lo ripara esaki ora boso lesa su bukinan.

Ruthy ta gradici Dios Tata pa cada dia regala, pa cada situacion, cada experiencia, cada les, cada circunstancia y pa cada momento. Y…….pa cada bendicion.

Abo tambe como lector y prohimo ruman sea bendiciona or abo lesa cu un curason habri loke Ruthy ta comparti, pasobra e ta encanta e arte di skirbi y di expresion liber, sea den poema, relato, reseña of storia.

Ta p’esey e ta comparti cu boso tur loke e ta skirbi den e buki aki, for di profundo di su curason.

 “Sigui….inspira pa duna” (cuentanan pret, serio y un tiki tribi cu nos tur por pas’aden. Como parti di un luz humildemente comparti. Presenta y relata na un manera simpel di curason pa curason, pa inspira abo tambe un tiki). Y tambe “Poemanan di Ruthy” (poesianan na nos dushi Papiamento).

Source: https://diario.aw/2012/08/lady-ruth-ta-firmando-buki-na-van-dorp/